Coronavirus

Sen dúbida é esta a palabra máis empregada nos últimos tempos. Pero @s vos@s fill@s saben realmente de qué se trata? 

Non estou pensando en falarlles dende o pesimismo. Aínda que sendo realistas a situación reviste severa gravidade pídovos que fagades un exercicio de empatía e vos poñades no lugar d@s cativ@s. Algúns de vós tedes visto a película “La vida es bella”, nela un pai constrúe toda unha historia de fantasía para disfrazarlle ao seu fillo a experiencia vivida nun campo de concentración coma un xogo. 

En nada axuda unha actitude derrotista ou negativa, temos que protexelos, non só coas medidas de prevención necesarias senón tamén con xogos e humor, pois debido á súa curta idade, non teñen ferramentas para facer fronte á situación que estamos a vivir.
- O xogo do coronavirus: pintar no dorso das mans con rotulador o virus e comprobar como vai desaparecendo a medida que levamos a cabo as medidas de hixiene.

- Explicarlles que ao tusir e ao estornudar imos protexernos coma Batman 🤣 porque superheroínas e superheroes protéxense e protexen aos demáis.

-Podemos dicirlle que o virus é algo tan diminuto que non podemos ver e que entraña certos perigos, por iso temos que ser moi disciplinados coas medidas de hixiene e coa recomendación de quedar na casa. Explicar que esta situación é algo pasaxeiro pero que dela imos aprender a extremar as medidas de hixiene sempre. Amosarlles unha imaxe do virus vista co microscopio e que o debuxen ou modelen con plastilina. Devezo por ver as vosas creacións, seguro que son superorixinais e simpatiquísimas 😄

Para rematar déixovos un video que explica bastante ben en qué consiste o virus: